రామాలయం

చారిత్రక వైభవానికి, ఆధ్యాత్మిక శోభకు నిలయమైన మన చందుపట్ల మకుటంలో ప్రధాన ఆధ్యాత్మిక మణిహారం మన శ్రీ సీతారామచంద్ర స్వామి ఆలయం. సుమారు ఐదు వందల సంవత్సరాల సుదీర్ఘ చరిత్ర కలిగిన ఈ దివ్య క్షేత్రం, కేవలం ఒక గ్రామానికి మాత్రమే పరిమితం కాకుండా చుట్టుపక్కల ప్రాంతాల భక్తుల ఇలవేల్పుగా భాసిల్లుతోంది. ముఖ్యంగా చందుపట్ల, కేతేపల్లి మండలంలోని బండపాలెం గ్రామస్తుల నడుమ ఈ ఆలయం ఐదు శతాబ్దాలుగా ఒక అద్భుతమైన ఆత్మీయ వారధిగా నిలుస్తోంది. రెండు గ్రామాలు.. ఒకే ఆరాధ్య దైవం ఈ క్షేత్రంలోని మూలవిగ్రహాలను చందుపట్ల మరియు బండపాలెం గ్రామస్తులు తమ ఇలవేల్పుగా, కంటికి రెప్పలా పూజిస్తారు. తరతరాలుగా వస్తున్న ఆచారాల ప్రకారం.. మూలవిగ్రహాలు చందుపట్లలో కొలువై ఉంటే, స్వామివారి ఆధ్యాత్మిక లీలలు, ఉత్సవాలు రెండు గ్రామాల భాగస్వామ్యంతో అత్యంత వైభవంగా జరుగుతాయి. ఏటా చైత్ర మాసం రాగానే ఈ ప్రాంతంలో పండుగ వాతావరణం నెలకొంటుంది. చైత్రశుద్ధ పంచమి రోజున చందుపట్ల ఆలయం నుండి శ్రీ సీతారామ స్వామి, లక్ష్మణుడు ఉత్సవ విగ్రహాలను అత్యంత భక్తిశ్రద్ధలతో, మంగళవాయిద్యాలు, కోలాటాల నడుమ బండపాలెంలోని గుట్టపైకి ఊరేగింపుగా తీసుకెళ్తారు. ఈ దృశ్యం రెండు గ్రామాల ప్రజల భక్తి పారవశ్యానికి అద్దం పడుతుంది.